Arnold Bürkli

Dr Arnold Bürkli (* 2. Februar 1833 z Züri; † 6. Mai 1894 au daa) isch e Schwiizer Bauingenieur und Politiker gsy.

Dr Bürkli het sid 1850 bim Stadtbouamt vo Züri und vo 1853 aa bi dr Nordoschtbahn gschaffet. Denn het er sech z Berlin und uf ere Studiereis uf Belgien, Ängland und Frankrych wyterbildet.

1858 isch er bi de Vereinigte Schwiizerbahne agstellt gsi, bevor er Stadtingenieur vo Züri worden isch. A dere Posizioon het er wäsentlech es paar grossi stedteboulichi Projäkt chönne gstalte: Under iim sin d Bahnhofbrugg, d Bahnhofstraass, ganzi Kwartieralaage, di stedtisch Wasserversorgig und d Seepromenade mit der Quaibrugg plaanet und bout worde.

Am See lyt dr Bürkliplatz, wo an iin erinneret.

Dr Arnold Bürkli isch vo 1883 bis 1892 Zürcher Kantonsrat, vo 1888 bis 1892 för di Freisinnige Nationalroot und vo 1876 bis 1893 Presidänt vom Schwiizerischen Ingenieur- und Architekteverein (SIA) gsy.

• Werner Stutz: Bürkli, Arnold. In: Historisches Lexikon vo dr Schwiiz.
• Walter Baumann: Arnold Bürkli: 1833–1894. Aufbruch in eine neue Zeit. Schweizer Pioniere der Wirtschaft und Technik. Verein für wirtschaftshistorische Studien, Meilen 1994, ISBN 3-909059-05-8

 Commons: Arnold Bürkli – Sammlig vo Multimediadateie

• dr Bürkliplatz