Evangelisch-reformierti Landeschile vom Kanton Züri
Die Evangelisch-reformierti Landeschile vom Kanton Züri isch dr Chileverband vo de Refermierte vom Kanton Züri.
Es isch die eltischti refermierti Chile. Si isch vom Ueli Zwingli begründet woorde. Sit 1803 isch d Chile vom Staat organisatorisch unabhängig woorde, aber de Staat hät na bis zum nöie Chilegsetz vo 2007 zimli vil mitgredt. Doozmool het er sich us allem Organisatorische zruggzoge.
Gägewäärtig wäärded vil Chilegmeinde zämegleit; im Jaar 2019 sind s drum no 135. Das sind emol d Ortschilegmeinde, und drzue ane chömed no die französischsproochigi Chilegmeinschaft, die spanischsproochigi Chilegmeinschaft und die iteliänischsproochigi Waldänsergmeind. Gleitet wird d Chilegmeind vo de Chilepflääg, und die isch dr Chilegmeindversammlig reschp. nöi i dr Stadt Züri em Chileparlamänt Rächeschaft schuldig.
D Uufsicht über d Chilegmeinde händ d Bezirkschilepfläge. D Landeschile hät wie de Kanton zwölf Bezirk, wo mee oder weniger di glych Flächi händ.
S oberschte Orgaan vo dr Landeschile isch d Synoode, wo 120 Mitgliider het. D Synoode wäält dr Chileroot, wo sibe Persoone drin sind. Dr Presidänt vom Chileroot isch sit 2011 dr Pfaarer Michel Müller-Zwygart.
D Zürcher Chile ghört zur Evangelisch-reformierte Chile Schwiiz.
Iire isch dr Theoloogisch Verlag Züri, wo näbe vil anderem au d Zytschrift Zwingliana un d Zürcher Bible (im bsundere Verlag der Zürcher Bibel) und refermierti Chilegsangbüecher usegit.
Weblink
[ändere | Quälltäxt bearbeite]
