Franz Blankart

Dr Franz André Blankart (* 27. Novämber 1936 z Baasel; † 17. Jänner 2021^[1]) isch e Schwyzer Diplomat gsii.

Dr Franz Blankart isch z Baasel uf d Schuel gange. Derno het er Filosofy (bim Karl Jaspers), Dytsch, Chunschtgschicht, Nationalekonomy un Rächt an dr Universitet Baasel, dr Sorbonne z Paris, dr University of Exeter un dr Universitet Bärn studiert. Är isch Mitglid vu dr Zofingia un in dr Johr 1964 bis 1965 däre ire Centralpräsident gsii. Anne 1964 isch er an dr Universität Baasel mit dr Arbet Zweiheit, Bezug und Vermittlung zum Dr. phil. promoviert wore.

Anne 1965 isch dr Blankart in diplomatische Dienscht vu dr Schwyz yydrätte. Zerscht isch er Botschaftsattaché z Den Haag gsii, no Privatsekretär vu dr Bundesreet Willy Spühler un Pierre Graber. Derno het dr Blankart di europa- un wirtschaftsbolitische Inträsse vu dr Schwyz verdrätte. Är het unter anderem fir d Schwyzer Mission bi dr EG z Brüssel gschafft, isch Mitarbaiter vum Staatssekretär Paul Jolles bi dr Verhandlige iber s Freihandelsabchuu gsii un het s Versicherigsabchuu zwische dr Schwyz un dr EG uusghandlet. Dr Blankart isch Verhandligslaiter fir d Uruguay-Rundi vum GATT gsii, un Schefunterhändler vu dr Schwyz bi dr EWR-Verhandlige. Vu 1986 bis zue sym Ruggdritt anne 1998 het er as Staatssekretär s Bundesamt fir Ussewirtschaft (hite Staatssekretariat fir Wirtschaft) im Aidgnessische Volkswirtschaftsdepartement glaitet.

In dr Johr 1974 bis 2002 isch dr Blankart Dozänt am Gämfer Hochschuelinschtitut fir internationali Studie gsii. Vu 1999 bis 2005 isch er Mitglid vum Universitetsrot Baasel gsii.

Dr Franz Blankart isch Mitglid vu dr FDP un Oberscht vu dr Schwyzer Armee gsii. Är isch in zwooter Ee gharote gsii un het zwai Chinder ghaa. Dr Blankart isch dr Brueder vum Volkswirtschafter Charles B. Blankart gsii^[2] un Kusäng vu dr Diplomati Heidi Tagliavini. Är isch Verwaltigsrotsbresidänt vu dr familienaigene Blankart & Cie Aktiengesellschaft gsii.^[3]

Dr Blankart isch im Jänner 2021 im Alter vu 84 Johr gstorbe.

• Bryys vu dr Landmann-Stiftig, Baasel, fir e Ibersetzig vu s Ciceros Paradoxa stoicorum (1954)
• Dr. Friedrich von Napolski-Bryys (1988)
• Distinguished Associate of the Atlantic Economic Society (1990)
• Feschtschrift „Diplomatische Negoziation“ zum 60. Geburtsdag, uusegee vum Mario Corti (1996)
• Europäische Wirtschaftsbryys (1997)
• Jubiläumsmedaille vu dr Karls-Universitet Prag (1998)
• Ehremitglid vum Swiss Business Club, Dubai
• Bryys vu dr Induschtry-Holding fir bsunderi Laischtige uf em Biet vu dr Ussewirtschaft (1999)
• Ehremitglid vu dr Handelschammere Senegal–Schwyz (1999)
• Kommandeurschryz vum Verdienschtorde vu dr Republik Pole (2005)
• Großchryz vum Verdienschtorde „Pro Merito Melitensi“ vum Souveräne Malteserorde] (2017)

• Dokumente von und über Blankart, Franz i de Datebank Dodis vo de Diplomatische Dokument vo de Schwiiz

1. ↑ Franz Blankart 84-jährig gestorben. In: bote.ch. 17. Januar 2021, abgruefen am 17. Januar 2021. 
2. ↑ Machtnetz von Rudolf Matter: Der Konvergenz-Mann In: Bilanz 13/10, 2. Juli 2010.
3. ↑ Verwaltungsrat und Geschäftsleitung Blankart & Cie.

Dä Artikel basiert uff ere fräie Übersetzig vu dere Version vum Artikel „Franz_Blankart“ vu de dütsche Wikipedia. E Liste vu de Autore un Versione isch do z finde.