Joseph Leonz Andermatt

Dr Joseph Leonz Andermatt (* 5. Mai 1740 z Baar ZG; † 2. November 1817 ebedo) isch e Schwiizer Milidär und Politiker gsi. 1801 isch dr Andermatt zum General vo dr Helvetische Republik ernennt worde.

Dr Joseph Andermatt stammt us ere Familie vo dr Zuger Aristokratii. Er het am Gymnasium glehrt und isch denn Söldner worde.

1758 isch er in dr französisch Solddienst iidräte und het am Siibejöhrige Chrieg deilgnoh und fümf Johr z Spanie dient. 1769 isch zum Hauptmä beförderet worde. 1790 het s Regimänt vom Andermatt z Nancy en Ufstand niidergschlage, dodrfür isch er zum Ritter vom Heilige-Ludwig-Orde gschlage worde. Noch em Sturm uf d Tuilerie 1792 isch er noch Zug zrugg.

Im Johr druf isch er im Rang vom ene Oberstlütnant in d Dienst vo Sardinie-Piemont iidräte. Währed em Erste Koalitionschrieg isch er 1796 zum Oberst ufgstiige, het sich aber gweigeret für Frankriich gegen Östriich z kämpfe und isch inhaftiert worde. Wäge däm isch er im Früehlig 1798 wider noch Zug zrugg.

Z Zug het er zerst die kantonali Miliz gege d Franzose gfüehrt, isch aber noch dr Niiderlag bi Hägglige ins Lager vo de Revolutionäre übergange. 1799 het er as Brigadier vo dr Helvetische Legion im Zweite Koalitionschrieg kämpft und isch in östriichische Chriegsgfangeschaft gfalle.

1801 isch dr Andermatt vom Militär in d Verwaltig übere und isch Kommissär vo dr Helvetische Republik im Kanton Rätie worde. Im Oktober 1801 het er am föderalistische Staatsstreich deilgnoh und isch noch däm siim Erfolg zum General vo dr Helvetische Republik und zum Senator vom Kanton Zug ernennt worde. 1802 isch dr Andermatt aber wider ins politische Lager vo de Unitarier übergloffe und het dr unitarisch Gegeputsch im April 1802 understützt. Im Ufdrag vo dr unitarische Regierig het dr Andermatt im Summer und Herbst 1802 die helvetische Druppe gege die ufständische Kantön vo dr Innerschwiiz und gege Züri gfüehrt. Sini zögerlichi Strategii isch mitverantwortlig für en Usbruch vom Stäcklichrieg und si Usgang. Noch dr Intervention vom Napoleon het dr Andermatt dr Kanton Zug in dr Helvetische Consulta z Paris verdräte.

Nochdäm er zrugg cho isch het er keini öffentlige Ämter meh usgfüllt. Er isch am 2. Novämber 1817 z Baar gstorbe.

• Renato Morosoli: Andermatt, Joseph Lorenz. In: Historisches Lexikon vo dr Schwiiz.
• Meyer-Ott: Andermatt, Joseph Lorenz. In: Allgemeine Deutsche Biographie (ADB). Band 1, Duncker & Humblot, Leipzig 1875, S. 429.

Dä Artikel basiert uff ere fräie Übersetzig vu dere Version vum Artikel „Joseph_Leonz_Andermatt“ vu de dütsche Wikipedia. E Liste vu de Autore un Versione isch do z finde.