Luis Buñuel
.svg){kind=small}
 | Esti artículu o seición necesita un ameyoramientu no que cinca a la redaición, la gramática o la ortografía. |
Luis Buñuel Portolés (22 de febreru de 1900, Calanda – 29 de xunetu de 1983, Ciudá de Méxicu) foi un direutor de cine español naturalizáu mexicanu. La mayor parte de la so obra foi realizada en Méxicu y Francia y ye consideráu ún de los más importantes y orixinales direutores de la historia del cine.
Biografía
[editar | editar la fonte]Los sos primeros años
[editar | editar la fonte]Luis Buñuel nació en Calanda el 22 de febreru de 1900. So padre, Leonardo Buñuel González, orixinariu del mesmu pueblu, onde tenía un negociu de ferretería, consiguiera una pequeña fortuna en Cuba y tres la Guerra de Cuba liquidó los sos negocios y volvió al so pueblu natal, onde se casó con María Portolés Cerezuela, muncho más moza qu'él, cola que tuvo siete fíos: Luis (1900), María (1901), Alicia (1902), Concepción (1904), Leonardo (1907), Margarita (1912) y Alfonso (1915). A los cuatro meses de la nacencia del so primoxénitu, la familia trasladóse a vivir a Zaragoza.
D'esta manera, Luis pasó tola so infancia y adolescencia en Zaragoza, onde cursó la educación primaria y secundaria. En 1908 asistió per primer vegada al cine Farrucini (una barraca con una lona como cubrición) pa ver una película coloriada a mano de dibuxos animaos. Nesa época'l cine yera consideráu todavía una atraición de feria y tovía tardó unos años n'haber sales estables. Luis vio mientres la so infancia munches películes (la so prima tenía accesu dende la cocina de la so casa a la pantalla d'unu de los primeros cines de Zaragoza). Cuando tenía trelce años, a la vuelta d'unu de los habituales viaxes a París de so padre y so madre, éstos regaláron-y un teatru con personaxes de cartón; con esti teatru entamó a ufiertar representaciones a los mozos del so pueblu.
A partir de 1913, paralelamente a los sos estudios, entamó a estudiar violín y a tocar nel coru de la Virxe del Carmen de Zaragoza. Esi mesmu añu salió per primer vegada d'Aragón y viaxó a Vega de Pas (Cantabria). En 1915 foi espulsáu polos xesuites del colexu a causa d'un enfile y se matriculó nel Institutu de Enseñanza Media de Zaragoza (más tarde llamáu Goya) como alumnu llibre. Nesa época lleió L'orixe de les especies de Darwin.
A los 17 años, termináu'l bachilleratu, partió a Madrid pa cursar estudios universitarios. Na capital agospióse na recién creada Residencia d'Estudiantes, fundada pola Institución Llibre d'Enseñanza, onde permaneció siete años. El so propósitu yera estudiar, inducíu pol so padre, Inxeniería Agrónoma. Nesta época interesóse pol naturismu y llevó una alimentación y vistimienta espartanes, gustando de llavase con agua xelao. Tomó parte de les actividaes del cine-club de la Residencia y trabó amistá con, ente otros, Salvador Dalí, Federico García Lorca, Rafael Alberti, Pepín Bello y Juan Ramón Jiménez. Tamién participó nes conxustes ultraístes y, tolos sábados dende 1918 hasta 1924, nes del Café Pombo, dirixíes por Ramón Gómez de la Serna.
En 1920 inició, col doctor Ignacio Bolívar, estudios d'entomoloxía, qu'abandonó pa matriculase en Filosofía y Lletres, caña d'Historia, una y bones informárase de que dellos países ofrecíen trabayu como llector de español a llicenciaos en Filosofía y Lletres, lo que suponía una oportunidá de cumplir el so deséu de salir d'España.
Colos sos compañeros de la Residencia fixo los sos primeros ensayos de puesta n'escena, con versiones delirantes del Don Juan Tenorio nes qu'actuaben Lorca, Dalí y otros compañeros.
En 1921, añu del Desastre d'Annual, conoció na Residencia al hermanu d'Abd el Krim, dirixente de la resistencia contra la dominación colonial española y francesa nel norte de Marruecos. Visitó per primer vegada Toledo, ciudá que causó una fonda impresión en Buñuel y los sos amigos. Tamién tuvo conocencia nestos años de los enclinos internacionales más importantes del pensamientu y del arte y mostró interés pol Dadaísmu y la obra de Louis Aragon y André Breton. Y de xacíu siguió asistiendo con regularidá al cine.
En 1923 morrió so padre en Zaragoza, entamó'l serviciu militar y publicó'l so primer artículu, al que siguieron cuentos y poemes en revistes de vanguardia ya inclusive preparó un llibru que los arrexuntaba baxo'l títulu Un perro andaluz. Munches de les imáxenes de los sos escritos d'estos años, previos al surrealismu francés, pasaron al so cine. El día de San Xosé d'esi mesmu añu de 1923 fundó la paródica Orde de Toledo y nómase a sí mesmu condestable. Pa ser caballeru había qu'enfilase y tar tola nueche ensin dormir. A ella pertenecieron, ente otros, Dalí, Pepín Bello, Alberti...
En 1924, añu en que Dalí realíza-y la so primer semeya, llicencióse n'Historia y arrenunció al doctoráu, decidíu a colar a París, la que daquella yera capital cultural d'occidente.
París y primeres películes
[editar | editar la fonte]En xineru de 1925, depués d'asistir a la conferencia que da Louis Aragon na Residencia d'Estudiantes, Buñuel abandonó Madrid camín de París. Na capital francesa asistió a les conxustes de los inmigrantes españoles y avérase cada vez más al grupu surrealista. La so afición pol cine intensificóse y vía davezu trés películes al día, una pela mañana (xeneralmente proyeiciones privaes, gracies a un pase de prensa), otra pela tarde nun cine de barriu y otra pela nueche. También comenzó a collaborar como críticu en delles publicaciones de cine y arte, como Cahiers d'Art, Alfar, L'Amic de les Arts, Helix, Horizonte y La Gaceta Lliteraria. Nelles dexó constancia de les sos concepciones cinematográfiques, daqué no que non se prodigó en delantre.
El pianista Ricardo Viñye propúnxo-y la direición escénica de El retablo de Maese Pedro de Manuel de Falla, que, estrenada n'Ámsterdam el 26 d'abril de 1926 y representada tamién al día viniente, supunxo un importante éxitu. Esta esperiencia-y llevó a escribir una pieza de teatru de cámara de vanguardia titulada Hamlet en 1927, que foi estrenada nel Café Sélect de París.
La so conversión total al cine prodúxose en viendo la película Les trés lluces (Der müde Tod) de Fritz Lang. Delles selmanes después se presentó nun rodaxe al conocíu direutor de cine francés Jean Epstein y ofrecióse a trabayar en cualesquier llabor a cambéu d'aprender tolo que pudiera avera del cine y Epstein acabó permitiéndole desempeñar el cargu d'ayudante de direición nel rodaxe de los sos películes mudes Mauprat y La caída de la casa Usher (La chute de la maison Usher), de 1928.
Tamién nestos años collaboró como actor en pequeños papeles, como'l de contrabandista na película Carmen, de los estudios Albatros, con Raquel Meller, y en La Sirène des Tropiques con Joséphine Baker. Tou esti bagaxe -y familiarizó col oficiu cinematográficu y permitió-y conocer a bonos profesionales y actores que depués habríen de collaborar con él en Un perro andaluz y La edá d'oru, les sos dos primeres películes. Como críticu, afalagó'l cine de Buster Keaton y atacó, por considerala pretenciosa, la vanguardia cinematográfica francesa, en que les sos files militaba'l mesmu Jean Epstein. Ye conocida la so rotura con ésti al negase Buñuel a trabayar nel nuevu proyeutu del más reputáu de los direutores vanguardistas franceses, Abel Gance.
Cada vez más interesáu pol grupu surrealista de Breton, comenzó a treslladar a los sos compañeros de la Residencia d'Estudiantes les novedaes d'esti enclín, escribiendo poemes d'un surrealismu ortodoxu y encamentando a Dalí a que se treslladara con él a París pa conocer el nuevu movimientu. En 1927 escribió Polismos y viaxó a la Residencia d'Estudiantes pa dirixir un ciclu de cine.
En 1928 preparó un guión cinematográficu sobro Francisco de Goya con motivu del centenariu del so fallecimientu, patrocináu por una comisión zaragozana. El proyeutu nun llegó a bon término por falta de presupuestu, como tampoco otru basáu nun guión de Ramón Gómez de la Serna que diba titulase El mundu por diez céntimos, nel que'l filu conductor diben ser los socesivos cambeos de dueño d'una moneda. Esti mesmu añu adhirióse al grupu surrealista de París. En collaboración con Ramón Gómez de la Serna terminó'l guión de Caprichos, que nunca se llega a rodar. Collaboró nel númberu especial de la gaceta lliteraria Cinema 1928.
En xineru de 1929, Buñuel y Dalí, n'estrecha collaboración, peracabaron el guión d'un filme que'l so proyeutu se titularía socesivamente El marista na ballesta, Ye peligrosu asomarse al interior y, a lo último Un perro andaluz. La película se comenzó a rodar el 2 d'abril con un presupuestu de 25.000 pesetes apurríes pola ma de Buñuel. Se estrenó el 6 de xunetu nel Studio des Ursulines, un cine-club parisín, nel qu'alcanzó un clamorosu éxitu ente la intelectualidá francesa, y permaneció n'exhibición nueve meses consecutivos nel Studio 28.
A partir de la proyeición de Un perro andaluz, Buñuel foi almitíu de llenu nel grupu surrealista, qu'aconceyaba diariamente nel Café Cyrano pa lleer artículos, aldericar sobro política y escribir cartes y manifiestos. Allí, Buñuel fizo amistá con Max Ernst, André Breton, Tristan Tzara, Yves Tanguy, Magritte y Louis Aragon, ente otros.
A fines de 1929 se volvió a axuntar con Dalí pa escribir el guión de lo que sería más tarde La edá d'oru, pero la collaboración yá nun resultó tan fructífera, pos ente los dos interpónse'l gran amor de Dalí, Gala Eluard. Buñuel comenzó'l rodaxe de la película n'abril de 1930, cuando'l pintor atopábase esfrutando d'unes vacaciones con Gala en Torremolinos. Cuando descubrió que Buñuel yá acabó la película, col sustanciosu mecenazgu de los Vizcondes de Noailles, que deseyaben producir una de les primeres películes sonores del cine francés, Dalí se sintió marxináu del proyeutu y traicionáu pol so amigu, lo qu'orixinó un distanciamientu ente ellos que se foi amontando nel futuru. A pesar d'aquello, felicitó a Buñuel pol largumetraxe, asegurando que-y había paecíu "una película americana". L'estrenu tuvo llugar el 28 de payares de 1930. Cinco díes más tarde grupos d'estrema derecha atacaron el cine onde se proyeutaba y les autoridaes franceses acabaron prohibiendo la película y requisaron toles copies esistentes, empezando una llarga censura que duraría mediu sieglu, pos por casu nun sería distribuyida hasta 1980 en Nueva York y un añu depués en París.
En 1930 Buñuel viaxó a Hollywood, axustáu pola Metro Goldwyn Mayer, como 'observador', con cuenta de familiarizase col sistema de producción d'Estaos Xuníos. Ellí conoció a Charles Chaplin y Sergei Eisenstein. En 1931 llegó a España, en viespores de la proclamación de la Segunda República. La edá d'oru proyeutóse en Madrid y Barcelona. En 1932 asistió a la primer aconceyamientu de la Asociación d'Escritores Revolucionarios (AERA), se separó del grupu surrealista y afilióse al Partíu Comunista francés. Axustáu pola Paramount, regresó a España y trabayó como responsable de sincronización. En 1933, financiáu pol so amigu Ramón Acín, filmó Las Hurdes, tierra ensin pan, un documental sobro esa contorna estremeña. La derecha y la Falange Española empezaben a remontase en España y la película foi censurada pola moza y débil Segunda República Española por considerala denigrante pa España. Esi mesmu añu firmó un manifiestu contra Hitler con Federico García Lorca, Rafael Alberti, Sender, Ugarte y Vallina.
En 1934 visitó en París a Dalí, yá casáu con Gala Eluard. Dalí comportóse bien indiferente con Buñuel, colo qu'empezó el so distanciamientu. El 23 de xunu casóse con Jeanne Rucar, a la que había conocío en casa del so amigu Joaquín Peinado en 1925 cuando estudiaba anatomía en París y que había ser medaya de bronce de ximnasia artística nos Xuegos Olímpicos de París 1924. La boda celebróse na alcaldía del distritu XX de París, ensin convidar a la familia, con trés testigos improvisaos (unu d'ellos, un transeúnte desconocíu) y, depués de comer, Buñuel volvió a Madrid, una y bones había aceptáu trabayar pa la Warner Brothers como direutor de doblaxe. La pareya tendría dos fíos, Jean Louis, nacíu en París, y Rafael, en Nueva York.
En 1935, con ayuda de dalgún dineru familiar, fundó, xunto a Ricardo Urgoiti, la productora Filmeófono, que competía cola Cifesa de los hermanos Casanova, principal productora española de los años trenta. Filmeófono produció películes como Don Quintín el amargao, onde debúó nel cine la 'bailaora' Carmen Amaya, La fía de Juan Simón, ¿Quién me quiere a mí? o ¡Centinela alerta! y la única condición de Buñuel pa produciles yera, curiosamente, nun apaecer na ficha téunica, pos a los sos güeyos nun yeren más que "melodrames baratos". Toos estos llargumetraxes foron rentables y supunxeron la consolidación de la industria cinematográfica española de los años trenta. Sicasí, la Guerra Civil albuertó esti proyeutu.
La Guerra Civil. Estaos Xuníos
[editar | editar la fonte]El golpe d'estáu franquista sorprendió a Buñuel en Madrid. De mena que Dalí alineárase con Franco y simpatizó col bandu nacional, Buñuel siempres permaneció fiel a la democracia de la República. Sicasí, nun dexó por ello d'ayudar a amigos suyos del bandu franquista cuando tuvieron en peligru de muerte; así, logró que lliberaren a José Luis Sáenz de Heredia (primo hermanu de José Antonio Primo de Rivera, fundador de Falange), que simpatizaba con Franco, pos habíen trabayao xuntos en Filmeófono. El 18 d'agostu de 1936 ye asesináu Lorca.
En setiembre de 1936 salió de Madrid nun tren atarraquitáu escontra Xinebra, vía Barcelona. Ellí taba citáu pa una entrevista Álvarez del Vayo, ministru d'Asuntos Esteriores de la República, que lu mandó a París como home d'enfotu de Luis Araquistáin, embaxador en Francia, pa realizar distintes misiones, principalmente d'intelixencia. Supervisó y escribió xunto a Pierre Unik el documental España lleal n'armes. Realizó el so bautismu aereu en dellos viaxes a España, en misiones de guerra.
De mientres 1937 encargóse de supervisar pal gobiernu republicanu'l pabellón español de la Esposición Internacional de París. Dalí pintó-y la so segunda y última semeya: El sueño. El 16 de setiembre de 1938, ayudáu nos gastos de viaxe polos sos amigos Charles Noailles y Rafael Sánchez Ventura, viaxó a Hollywood otra vuelta, esta vegada encargáu pol gobiernu republicanu de la supervisión, como conseyeru téunicu ya históricu, de dos películes alrodiu de la Guerra Civil que se diben a rodar n'Estaos Xuníos.
Terminada la Guerra, en 1941, cuando empezaba'l rodaxe de Cargo of Innocents, la asociación xeneral de productores d'Estaos Xuníos prohibió toa película en contra de Franco, lo que significó'l fin del proyeutu, nel que taba implicáu Buñuel. Ensin trabayu y con poco dineru, y yá cola so muyer y fíos axuntaos con él, aceptó l'encargu que-y ufierta'l Muséu d'Arte Moderno (MOMA) de Nueva York, como productor asociáu pal área documental y supervisor y xefe de montaxe de documentales pa la Coordinación d'Asuntos Interamericanos, que dirixía Nelson Rockefeller. La so misión yera esbillar películes de propaganda antinazi; tenía despachu propio y personal al so cargu. D'esti cargu foi despidíu en 1943 a raíz de la publicación del llibru La vida secreta de Salvador Dalí, onde'l pintor tachaba a Buñuel d'atéu y home d'izquierdes. Un periodista del Motion Pictures Herald atacó a Buñuel nun artículu onde alvertía alrodiu de lo peligrosu que resultaba la presencia d'esti español nun muséu tan prestixosu. Buñuel aconceyó con Dalí en Nueva York pa pidi-y esplicaciones y esa entrevista significó la rotura de les sos rellaciones.
Volvió a Hollywood y púnxose a trabayar pa la Warner Brothers como xefe de doblaxe de versiones españoles p'América Llatina. Acabada la collaboración cola Warner en 1946, se quedó en Los Angeles en busca d'un trabayu rellacionáu col cine y de que-y concedieren la nacionalidá d'Estaos Xuníos, que había solicitáu.
Etapa mexicana
[editar | editar la fonte]Cuando Luis Buñuel entá taba viviendo del dineru que había aforráu l'añu anterior, la casualidá quixo que nuna cena en casa del cineasta francés René Clair atopárase con Denise Tual, la vilda del actor rusu Pierre Batcheff (protagonista de Un perro andaluz, que se suicidara en 1932). La muyer, que se volviera casar, col productor francés Ronald Tual, ofreció-y trabayar nel nuevu proyeutu que tenía intención de realizar: La casa de Bernarda Alba, que dirixiría Buñuel. Tual, que había llegao a Los Angeles col interés de conocer meyor la industria d'Estaos Xuníos del cine, tenía intención de realizar la película ente París y Méxicu, pa lo cual aprovechó el so regresu a París pa faer escala en Méxicu y concretar dellos asuntos col productor francés d'aniciu rusu Oscar Dacingers, exiliáu nesi país. Una vegada ellí enteráronse de que los derechos de la obra habían ser vendíos a otra productora que había puxáu más altu.
Atayáu'l proyeutu, Luis Buñuel tuvo la suerte de que Dacingers ufiertára-y otru trabayu: dirixir Gran Casino, una película comercial col conocíu cantante mexicanu Jorge Negrete y la primer figura arxentina Libertad Lamarque. Buñuel aceptó y, una vegada iguaos tolos papeles de residencia ya instaláu cola so esposa y los sos fíos, ingresó na industria mexicano del cine. Esta primer película de la so nueva etapa constituyó un atayante fracasu y de mientres los trés años vinientes se va ver obligáu a caltenese del dineru que-y unviaba so ma tolos meses.
En 1949, a puntu d'abandonar el cine, Dacingers-y pidió que se fixera cargu de la direición de El gran calavera, una y bones Fernando Soler non podía ser al empar direutor y protagonista. L'éxitu d'esta película y la concesión de la nacionalidá mexicana animaron a Buñuel a plantegar a Dacingers un nuevu proyeutu más acorde colos sos deseos como cineasta, proponiéndo-y, baxo'l títulu ¡Mi huerfanito, jefe!, un argumentu sobro les aventures d'un mozu vendedor de lotería. A esta ufierta siguió una meyor respuesta per parte de Dacingers, la realización d'una historia sobro los niños probes mexicanos.
Así, en 1950 Buñuel realizó Los olvidados, que nun primer momentu nun gustó a los mexicanos ultranacionalistes (Jorge Negrete el primeru), una y bones retrataba la realidá de probitú y miseria suburbana que la cultura dominante nun quería reconocer. Sicasí, el premiu al meyor direutor que-y dio'l Festival de Cannes de 1951 supunxo la reconocencia internacional de la película, y el redescubrimiento de Luis Buñuel, y la rehabilitación del cineasta per parte de la sociedá mexicana. Anguaño, Los olvidados ye una de les dos únicas películes reconocíes pola Unesco como Patrimoniu de la Humanidá.
En 1951 filmó Susana y Él, película que constituyó un fracasu comercial pero que sería revalorada nos años venideros. En 1952 salió de Ciudá de Méxicu pa filmar Subida al cielo, cinta simple onde un suañu del protagonista da'l toque surrealista de Buñuel y que-y valió dir nuevamente a Cannes. Esi mesmu añu filmó Robinson Crusoe, primer película que se rodó n'Eastmancolor (tolos días unviaben les copies a California pa comprobar los resultaos), y, xunto con La joven, que dirixó en 1960, una de les dos úniques películes que rodó n'inglés y con coproducción americana. En 1953 dirixó La ilusión viaja en tranvía, una de les películes consideraes "menores" pero que pol so frescor y cencellez, y sofitada por escritores como José Revueltes y Juan de la Cabada, sobrevive al pasu de los años.
En 1954 dirixó El río y la muerte y ye escoyíu miembru del xuráu del Festival Internacional de Cine de Cannes. En 1955, añu en que filmó Así es la aurora en Francia (lo que-y brinda la oportunidá de visitar a so ma en Pau), fiel a les sos idees, firmó un manifiestu en contra de la bomba atómica norteamericana , lo que, xunío al so sofitu a la revista antifacista España Libre (asitiada en contra de EE.XX.), supunxo'l so inclusión na llista negra norteamericana hasta 1975. A partir d'esi momentu, cada vez que pasaben por EE.XX., tanto él como la so familia yeren entrugaos. Sicasí, Buñuel dixo que EE.XX. yera la tierra más formosa qu'había conocío. Cuando daquién preguntába-y si yera comunista siempres contestaba que yera un español republicanu.
Tres de Ensayu de un crimen (1955), en 1956 realizó La muerte en ese jardín, con guión de Luis Alcoriza y Raymond Queneau qu'afaía la novela homónima de Lacour. The National Filme Theatre of London realizó una retrospectiva de la so obra. Nazarín (1958), Palma d'Oru del Festival de Cannes de 1959, ye la primer de les trés películes que realizaría col actor Paco Rabal. Esi mesmu añu rodó Los ambiciosos, cine de compromisu político y social. En 1960 dirixó por última vegada una obra teatral, Don Juan Tenorio, en Méxicu, y realizó y estrenó n'EE.XX. La joven. Depués regresó a España pa dirixir Viridiana, coproducción hispanu-mexicana con guión escritu xunto a Julio Alejandro. La película foi producida por Gustavo Alatriste (por parte mexicana) y por Pere Portabella y Ricardo Muñoz Suay, per parte de les productores españoles UNINCI (Unión Industrial Cinematográfica) y Films 59. Tuvo protagonizada por Silvia Pinal, Francisco Rabal y Fernando Rey.
Viridiana foi presentada a concursu nel festival de Cannes de 1961 como representante oficial d'España y llogró la Palma d'Oru, que recoyó l'entós direutor xeneral de Cinematografía, José Muñoz Fontán. Sicasí, depués de que'l periódico vaticanu L'Osservatore Romanu condergara la cinta, a la que tachaba de bocaya y sacrímanda, la censura española prohibió la cinta y Muñoz Fontán foi obligáu a dimitir. Viridiana nun se pudo proyeutar oficialmente n'España hasta 1977. Foi ganador del Premiu Nacional de Belles Artes pol gobiernu de Méxicu en 1977.
En 1962 rodó El ángel exterminador, una de les sos películes más importantes y personales y na qu'añadía delles chancies privaes de la so época de la Residencia d'Estudiantes y del periodu surrealista trescurríu en Francia.
Etapa francesa
[editar | editar la fonte]Yá na so etapa mexicana Buñuel había rodáu delles películes de producción francesa tres les eloxoses crítiques europees de Ensayo de un crimen, Así es la aurora o La muerte en el jardín, pero la so verdadera reentrada na cinematografía francesa prodúxose en 1963 con Diariu de una camarera, adautación de la novela d'Octave Mirbeau. Empieza así la so cooperación col productor Serge Silberman y el guionista Jean Claude Carrière.
En 1964 filmó la so última película mexicana, Simón del desierto, que nun acabó como taba proyeutada por falta de presupuestu. Entá así, llogró'l Lleón de Plata de la Mostra de Venecia al añu 1965, añu en qu'al par de Carrière, preparó les adautaciones de El monje y Là -bas.
En 1966, añu en que Dalí-y telegrafió ufriéndo-y preparar la segunda parte de Un perro andaluz, estrenóse Belle de jour, que llogró en 1967 el Lleón d'Oru na Mostra de Venecia. Esta película llogró en Francia un estraordinariu éxitu de públicu y a partir d'entós los estrenos de Buñuel convirtiéronse n'acontecimientos culturales, lo que motivó que Silberman concediéra-y completa llibertá creativa y los recursos abondos pa la producción de los sos filmes, lo que caracterizó la etapa final de la so obra. En 1969 la Mostra-y dio'l gran premiu d'homenaxe pol conxuntu de la so obra.
En 1970 volvió a España pa rodar, esta vegada en réxime de coproducción, Tristana, protagonizada por Catherine Deneuve, que yá había protagonizáu Belle de jour.
En 1972 se convirtió nel primer direutor español en consiguir el Oscar a la meyor película de fala non inglesa, por Le Charme Discret de la Bourgeoisie, película que se diba rodar n'España, lo que resultó imposible por cuenta de la censura. Esta película, xunto con La Vía Láctea (La Voie Lactée, 1968) y El fantasma de la libertad (Le Fantòme de la Liberté, 1974), conformen una especie de trilogía qu'ataca los cimientos del cine de narrativa convencional y el conceutu causa-consecuencia, abogando pola exposición del azar como motor de la conducta y del mundu. Esi mesmu añu de 1972 visitó Los Angeles, onde vivía'l so fíu Rafael, y George Cukor ofreció na so casa una cena n'honor de Buñuel a la qu'asistieron, además del so fíu Rafael y Carriére, importantes cineastes como Alfred Hitchcock, Billy Wilder, G. Stevens, William Wyler, R. Mulligan, Robert Wise o Rouben Mamoulian.
En 1977 Buñuel punxo'l colofón a la so obra con Ese oscuro objeto del deseo (Cet Obscur Objet du Désir), que recibió el premiu especial del Festival de Cine de San Sebastián. Na película, que revisa temes trataos enantes en Viridiana o Tristana, Carole Bouquet y Ángela Molina interpreten el personaxe femenín que da réplica a Fernando Rey.
En 1980 realizó'l so últimu viaxe a España y foi operáu de próstata. En 1981, 50 años depués de ser prohibida, se reestrenó en París La edad de oro, foi hospitalizáu por problemes de vesícula, Agustín Sánchez Vidal publicó la so obra lliteraria, el Centru Georges Pompidou de París organizó un homenaxe nel so honor y Un perro andaluz se proyeutó nuna pantalla asitiada nel techu d'esti centru cultural.
En 1982 publicó les sos memories, recoyíes a lo llargo de los años por Carriére y titulaes Mi último suspiro.
Luis Buñuel falleció en Ciudá de Méxicu'l día 29 de xunetu de 1983 pola madrugada, a causa d'una insuficiencia cardiaca, hepática y renal provocada por un cáncer. Les sos últimes pallabres foron pa la so muyer Jeanne: "Agora sí que muerro". Caltúvose fiel a la so ideoloxía hasta'l final: nun hubo nenguna ceremonia de despidida y anguaño desconozse dónde s'atopen les sos cenices. Esi mesmu añu foi nomáu doctor honoris causa pola Universidá de Zaragoza.
El so pensamientu
[editar | editar la fonte]A los catorce empezáron-y les sos duldes sobro la relixón, principalmente alrodiu de la resurrección de la carne, el xuiciu final, l'infiernu y el diañu. Según él mesmu dixo, yera "atéu, gracies a Dios". Amante del tabacu, del alcohol (pa él, un chigre yera un llugar de meditación y recoximientu) y de los burdeles (anque decía qu'una vegada casáu xamás foi infiel), quixo llibrase de les normes y principios de la sociedá que n'heriedu-y había dexáo tou un sistema de prohibiciones y represiones. Gustába-y la puntualidad, el bon vistir, dise puestu a la cama y madrugar, y llegó a tener una gran coleición d'armes. La so primer pistola túvola a les escondidielles a los catorce años, anque abondo enantes yá xugaba cola del so padre.
De mientres tola so vida, Buñuel foi un rebelde, hasta'l últimu momentu tuvo lluchando contra sí mesmu. El so interior dictába-y unes normes sobro la muerte, la fe, el sexu... que la so concencia nun podía aceptar. Esta dualidá-y marcó dende la so más tienra infancia. Buñuel rompió barreres lluchando a favor de la llibertá.
Yá con pocos años conoció la muerte de cerca, cuando un llabrador del so pueblu foi asesináu por otru d'un navayazu, y apañóseles pa colase na autopsia. Primeramente, viera cómo les aves de presa taramiaben un pollín muertu y, así, cuando tuvo la ocasión, compró un pollín muertu pa poder ver repitida la escena: yera como si esfrutara viendo cómo les utres arrincáben-y los güeyos y se comían al pollín, esgañando les sos carnes.
Gustába-y reflexar la visión pesimista y cruel de la vida. Así fíxolo en Las Hurdes, tierra sin pan, en Los olvidados... Sicasí, él yera pacífico y siempres tuvo encegoláu cola so propia muerte. La so hermana Conchita solía recordar que de pequeña había acompañao al so hermanu Luis a visitar campusantos y éste se tendía nes meses de les autopsies. A Luis gustába-y asistir a los entierros del so pueblu, así l'entierru que tien llugar en Abismos de pasión yera un reflexu de les alcordances de la so mocedá, según confesó él mesmu.
La visión de Buñuel topetaba cola realidá. Tenía bien presente la posibilidá del esfaimientu de la tierra, pensaba nes guerres, la bomba atómica. Afirmaba que nin la llibertá nin la xusticia existían. La pantasma de la llibertá reflexa'l so pensamientu. Yera tienru, piadoso, de vida ordenada. Tuvo una vida desafogada y una infancia feliz, pero la so concencia llevába-y a pensar no que él llamaba la Edá Media (los principios del sieglu XX y les sos miseries), esto ye, les inxusticies, que reflejó en Abismos de pasión, Nazarín, Él, La muerte en el jardín, La joven...
Vivió los años de represión sexual, quixo realizar una película pornográfica, pero desistió. Sicasí, el tema del sexu foi tratáu en munches de les sos películes: La joven, Ese oscuro objeto del deseo.
Yera, en ciertu mou, un anarquista, pero na so casa alendaba disciplina, nun permitía a les muyeres asistir a les xuntes d'homes. El llibru de memories de Jeanne Rucar llámase Memories d'una muyer ensin pianu porque Buñuel, ensin preguntar a naide, regaló'l pianu de la so muyer a un amigu que-y traxo trés botelles de vinu.
Nun foi nacionalista, pero añoraba España y la tierra de la so infancia; se nacionalizó mexicanu por pragmatismu, yá tuviera a puntu de nacionalizase norteamericanu unos años enantes. Nun-y gustaba viaxar, pero esfrutaba al visitar los sitios que-y traíen bones alcordances. Nun deseaba dir per Hispanoamérica y se quedó a vivir en Méxicu. Una reza mexicana que foi vecina suya na Colonia del Valle de la ciudá de Méxicu comentó que Buñuel nunca olvidó les sos raíces: en Selmana Santa víalu solu pel xardín de la so casa faciendo dobles con un tambor y dando vueltes y vueltes.
Luis Buñuel vieno d'una familia burguesa y bien relixosa, estudió y vivió la disciplina de la relixón, pero se podría argumentar que parte del so trabayu tien como meta, ente otros envises, camudar la sociedá na que vivimos, que se basa na relixón, la familia y l'orde establecíu, y qu'impóon una moral y un comportamientu social de la que nin siquier la burguesía que sofita'l poder ye llibre. Quixo que toles sos obres foren quemaes y así tener descansu y dignidá dende la nada.
Si siempres-y había encegoláu la muerte, nos últimos cinco años de la so vida, sordu, con poca vista, con dalguna operación qu'otra, dexó de ver cine, televisión y malapenes coyía un llibru, con esceición de La vieyera de Simone de Beauvoir, que lleía y relleía. Pensaba na so muerte y nel fin del mundu, bromiaba colos demás alrodiu de la so vieyera. Con ayuda del so amigu Jean-Claude Carriére, que de mientres más de 18 años recopiló material d'entrevistes y parolaes nos descansos de les filmaciones, escribió Mon dernier soupir ('El mio últimu sollutu'). Yá'l títulu reflexa la obsesión que tenía nos últimos momentos de la so vida; non quería da-yos importancia, pero pensaba nellos. Como yera atéu, pensaba n'axuntar el día de la so muerte a tolos sos amigos ateos y confesase. Pa él, ser bromista yera una forma de demostrar que taba en contra del orde. Esti llibru de memories inspiraría la película documental dirixida por Javier Espada y Gaizka Urresti y titulada El último guión que protagonicen Jean-Claude Carrière y Juan Luis Buñuel, percorriendo los llugares nos que transcurrió la vida de Buñuel: Calanda, Zaragoza, Madrid, Toledo, París, New York, Los Angeles y Méxicu.
Bibliografía
[editar | editar la fonte]- Alcalá López-Barajas, Manuel (1973). Buñuelː cine e ideología. Madrid: EDICUSA. Cuadernos para el Diálogo.. Consultáu'l 15 de xineru de 2018.
- Aub, Max, Conversaciones con Buñuel. Seguidas de 45 entrevistas con familiares, amigos y collaboradores del cineasta aragonés, Aguilar, 1985. ISBN 84-03-09195-8.
- Buñuel, Luis y Carrière, Jean-Claude, Mon dernier soupir, París, Éditions Robert Laffont, 1982. Edición española titulada Mi último suspiro, Barcelona, Random House Mondadori, coleición Debolsillo, 1982. Traducíu por Ana María Fuente. ISBN 84-9759-504-1.
- Camacho, E., Pérez Bazo, J.; Rodríguez Blanco, M., y otros: Buñuel, 100 años, Nueva York, Instituto Cervantes y The Museum of Modern Art, 2001. ISBN 0-8109-6219-5
- Enciso, Froylan, "En defensa del poeta Buñuel", en Andar fronteras. El servicio diplomático de Octavio Paz en Francia (1946-1951), Méxicu, Siglo XXI, 2008, páxs. 130-134 y 353-357. ISBN 978-607-3-00025-3
- Gibson, Ian, Luis Buñuel: la forja de un cineasta universal, 1900-1938, Madrid, Aguilar, 2013; formato digital (archivo de internet): ISBN 978-84-03-01389-6; formato en papel: ISBN 978-84-03-01379-7
- Krohn, B. y Duncan, P. (ed.), Luis Buñuel. The Complete Films, Colonia, Taschen, 2005. ISBN 3-8228-3375-4
- López Villegas, Manuel (ed.), Plantía:Enlace roto, Madrid, Páginas de espuma, 2000. ISBN 84-931243-0-3.
- Pérez Turrent, T. y De la Colina, J., Luis Buñuel: prohibido asomarse al exterior, Méxicu, Joaquín Mortiz/Planeta, 1986. ISBN 968-27-0215-1. Edición española titulada Buñuel por Buñuel, Madrid, Plot Ediciones, 1993. ISBN 84-86702-20-8
- Portolés Mombiela, Miguel, Historia de una rama de la familia Portolés, Copistería Lorente, Zaragoza, 2003.
- Rubia Barcia, José, Con Luis Buñuel en Hollywood y después, Sada (La Coruña), Ediciós do Castro, 1992. ISBN 84-7492-582-7
- Rucar, Jeanne y Marín del Campo, Marisol, Memorias de una mujer sin piano, Madrid, Alianza, 1991. ISBN 84-206-9619-6
- Sánchez Vidal, A. (ed.), Luis Buñuel. Obra literaria, Zaragoza, Ediciones Heraldo de Aragón, 1982. ISBN 84-85492-74-9
- — Buñuel, Lorca, Dalí. El enigma sin fin, Barcelona, Planeta, 1988 (2ª ed.). ISBN 84-320-5867-X
- — Luis Buñuel, Madrid, Cátedra, 2004 (4ª ed.) ISBN 84-376-2151-8.
- Zúñiga, J.F., "Adiós a Lilia Prado", en El Universal, 24 de mayo de 2006, Méxicu.
- Varios: "Lilia Prado, imagen del erotismo y la sensualidad" en Somos, Editorial Televisa, Méxicu.
Referencies
[editar | editar la fonte]- ↑ 1,0 1,1 Afirmao en: Gemeinsame Normdatei. Data de consulta: 9 abril 2014. Llingua de la obra o nome: alemán. Autor: Biblioteca Nacional d'Alemaña.
- ↑ 2,0 2,1 URL de la referencia: http://hcl.harvard.edu/hfa/films/2012julsep/bunuel.html.
- ↑ Afirmao en: Gemeinsame Normdatei. Data de consulta: 30 avientu 2014. Llingua de la obra o nome: alemán. Autor: Biblioteca Nacional d'Alemaña.
- ↑ URL de la referencia: https://fr.findagrave.com/memorial/6946038/luis-bu%C3%B1uel.
- ↑ Biblioteca Nacional de Francia. «autoridaes BNF» (francés). Consultáu'l 10 ochobre 2015.
- ↑ «Premio Nacional de Ciencias y Artes» (castellanu). Consultáu'l 28 ochobre 2024.
- ↑ Identificador del Boletín Oficial del Estado: BOE-A-1981-13992.
Enllaces esternos
[editar | editar la fonte]
Wikimedia Commons acueye conteníu multimedia sobre Luis Buñuel.- Videoartworld : The Masters Series (Películes y documentales en llinia. Videu de Buñuel en versión orixinal. Dominiu Públicu.)
- Buñuel, 100 años en Centro Virtual Cervantes
- Páxina oficial del centenariu del nacimientu de Luis Buñuel
- Páxina de Luis Buñuel del Gobiernu d'Aragón Archiváu 2007-01-18 en Wayback Machine
- Páxina web del centenariu del nacimientu del direutor (n'inglés)
- Biografía y filmografía
- «Palacio de hielo», poema de Luis Buñuel
- Centro Buñuel Calanda.
- «Pesimismo» Archiváu 2012-12-15 en Wayback Machine y otros testus de Buñuel, na Filmoteca de Zaragoza.
- Luis Buñuel en El Poder de la Pallabra (enllaz rotu disponible n'Internet Archive; ver l'historial y la última versión).
| Control d'autoridaes |
|
|---|
Datos: Q51545- Multimedia: Luis Buñuel
Cites famoses: Luis Buñuel