தினகர வெண்பா

தினகர வெண்பா ^[1][2] என்னும் நூல் 16 ஆம் நூற்றாண்டில் தோன்றியது. தினகரன் என்னும் வள்ளலைப் போற்றும் வகையில் அவனது பெயரில் எழுதப்பட்ட நூல். ^[3]

திருக்குறளைச் சார்ந்து பிற்காலத்தில் பல நீதி நூல்கள் தோன்றின. அவற்றில் பெரும்பான்மை திருக்குறளை இறுதியில் வைத்து எழுதப்பட்ட வெண்பாக்களால் ஆனவை. திருக்குறளை இடையில் வைத்துக் கட்டளைக் கலித்துறையால் எழுதப்பட்ட நூல் திருப்புல்லாணி மாலை. இவை எல்லாமே திருக்குறளுக்கு விளக்கம் சொல்பவை.

விளக்கத்தைக் கதை ஒன்றினால் சொல்வதும் அந்த நூல்களின் தன்மை. பொதுவாக இந்த நூல்கள் திருக்குறளில் உள்ள அதிகாரத்தில் ஒரு பாடலைத் தெரிவு செய்துகொண்டு அவற்றிற்கு விளக்கம் சொல்பவை. ^[4]

தினகர வெண்பாவில் 137 வெண்பாக்கள் உள்ளன. திருக்குறளில் உள்ள 133 அதிகாரம் ஒவ்வொன்றிலுமிருந்து ஒரு பாடல். 7, 24, 79 ஆம் அதிகாரங்களிலிருந்து மேலும் ஒவ்வொரு பாடல். மற்றும் காப்புச் செய்யுள். ஆக 137 வெண்பாக்கள் இதில் உள்ளன.

கையாற் பரிந்து அழைக்கக் கண்டு கிழந்தைச் சோமன்

செய்ய கட்டி ஈந்தான் தினகரா - வையத்துத்

தோன்றிற் புகழொடு தோன்றுக அஃதிலார்

தோன்றலின் தோன்றாமை நன்று.